“Ашығыс ярҙам” машинаһы алынды
Баймаҡ үҙәк ҡала дауаханаһының техник базаһы ошо көндәрҙә тағы ла бер “Ашығыс ярҙам” машинаһы менән тулыланды. Яңы автомобиль кешегә тәүге медицина ярҙамы күрһәтеүгә кәрәкле бөтә ҡоролмалар менән дә йыһазландырылған. ЭКГ, дефибриллия, яһалма тын алдырыу аппараттары бар. Һандар теле менән әйткәндә, машинаның хаҡы 1 млн 952 мең һум, ҡоролмалар 600 мең һум тора.
– Һүҙ юҡ, бындай ҡоролмалар менән йыһазландырылған машина беҙгә бик тә кәрәк, – тине “Ашығыс ярҙам” күрһәтеү хеҙмәте фельдшеры Самат Салауат улы Сәйфуллин. – Ҡайһы бер осраҡта минуттар түгел секундтар һанаулы, алтынға тиң, бәрәбәр ваҡыттар була. Кешегә тиҙ медицина ярҙамы күрһәтеү талап ителә.
– Саҡырыу алғас та 2 минут эсендә йыйынып, билдәле адрес буйынса сығырға тейешбеҙ, – тине “Ашығыс ярҙам” машинаһы водителе Радик Ҡәйепҡолов. – Юлдарҙың да, һауа торошоноң да төрлө саҡтары була. Шунлыҡтан машинаның төҙөк булыуы беҙҙең яуаплылыҡта. Ә инде яңы техника үҙен оҙайлы ваҡыт һынатмаҫ, тигән өмөттәбеҙ.
Бындай реомобиль машиналары менән республиканың 38 дауаханаһы тәьмин ителгән. Шуларҙың береһе – Баймаҡ үҙәк ҡала дауаханаһында. Ә шулай ҙа был бүлек хеҙмәткәрҙәренә ярҙам һорап саҡырыусыларҙың әҙерәк булыуын теләп ҡалабыҙ.
Лилиә Такаева.
Автор фотоһында: “Ашығыс ярҙам” машинаһы водителе Р. Ҡәйепҡолов һәм фельдшер С.Сәйфуллин.